ፕረሲደንት ሩስያ ቭላድሚር ፑቲን፡ ኣርባዕተ ዞባታት ዩክረይን ነበር ናብ ሩስያ ንኽጽንበራ ድሕሪ ዘካየድኦ ረፈረንደም ወግዓዊ ኣፍልጦ ዝህብ ሰነድ ከም ዝፈረመሉ ማዕከን ዜና ኣርቲ ሎሚ 30 መስከረም ገሊጻ።
ሎሚ ዓርቢ፡ ወግዓዊ ምጽንባር እተን ኣርባዕተ ዞባታት ናብ ፈደረሽን ሩስያ ከም ዝተኻየደ ድማ ተገሊጹ።
መራሕቲ ዞባታት ዶነስክ ሪፓብሊክ፡ ሉጋንስክ ሪፓብሊክ፡ ሀርሶን ከምኡ’ውን ዛፖሮዝያ ኣብቲ ስነ-ስርዓት ዝተረኸቡ ኮይኖም፡ ብሓባር ምስ ፕረሲደንት ፑቲን ወግዓዊ ሰነድ ከም ዝተፈራረሙ ተሓቢሩ።
ኣብ ኣርባዕቲአን ዞባታት ካብ 23 ክሳዕ 27 መስከረም ናብ ሩስያ ንምጽንባር ዘኽእል ረፈረንድም ምክያዱ ዝዝከር ኮይኑ፡ ህዝቢ እተን ዞባታት ብዓብላሊ ሚኢታዊት ከም ዝደገፎ ድማ ኣብ እዋን ዝተዘርገሐ ሓበሬታ የረድእ።
