ኣብ ዝሓለፈ ቅንያት ኣብ መንጎ መንግስቲ ኣውስትራልያን ዓርሞሸሽ ትካላት ተክኖሎጂን ዝተራእየ ዘይምቅዳው ዓለም ምሉእ ብኣንክሮ ዝከታተሎ ዘሎ ጒዳይ ኮይኑ ኣሎ። እቲ ጠንቂ ዘይምቅዳው ኮይኑ ዘሎ ዛዕባ፡ መንግስቲ ኣውስትራልያ ናይ ተክኖሎጂ ትካላት ፈይስቡክን ጎግልን ኣብ ድሕረ-ገጻተን ዝጥቅዐኦ ዜናታት ክፍሊት ክኸፍላ ዘገድድ ሕጊ ብምንዳፉ ዝሰዓበ እዩ። እዚ ሕጊ ምስ ዝጸድቕ፡ ናይ ተክኖሎጂ ትካላት ኣብ ድሕረ-ገጻተን ዘውጸአኦ ዜናታት ክኸፍላሉ ስለ ዝጅምራ ዓለማዊ ምልውዋጥ ኣብ ኣጠቃቕማ ሓበሬታ ክስዕብ ምዃኑ ተንተንቲ ተክኖሎጂ ይሕብሩ። ብዘሎ ሓፈሻዊ ገምጋም፡ ሰባት ዝበዘሐ ዜናታት ካብ ማሕበራዊ መራኸቢታት ከም ዝረኽብዎ ይፍለጥ።
ኣብ ኣውስትራልያ ንዝሰዓበ ኩነታት ብምቕዋም፡ ፈይስቡክ ኣብታ ሃገር ኣብ ድሕረ-ገጹ ዝኾነ ዜና ከም ዘይረአ ጌሩ ኣሎ። እዚ ድማ ንመንግስቲ ኣውስትራልያ ዓቢ መልእኽቲ ምዃኑ እዮም ተዓዘብቲ ዝገልጹ። ገለ ኣባላት ባይቶ ኣውስትራልያ’ውን ብፈይስቡክ ዝተወስደ ስጒምቲ፡ እቲ ትካል ኣንጻር ኣውስትራልያ ኲናት ከም ዝኣወጀ እዩ ዝቊጸር ይብሉ ኣለዉ። እቲ ቀንዲ ንመንግስቲ ኣውስትራልያ ከምዚ ዓይነት ናይ ፈለማ ሕጊ ንከተኣታቱ ዝደረኾ ግን ኣብ መንጎ መራኸቢ ቡዙሃንን ዓርሞሸሽ ትካላት ተክኖሎጂን ዘሎ ዘይፍትሓዊ ውድድር ምዃኑ ተዓዘብቲ ይገልጹ። መራኸቢ ቡዙሃን፡ በመገዲ ተለቪዥን፡ ራድዮን ጋዜጣን ዝቅርበኦ ዜናታት ገንዘብ ከፊለን ዘምጸኦኦ ክኾና እንከለዋ፡ ትካላት ተክኖሎጂ ግን ክሳዕ ሕጂ ብዘይ ዝኾነ ክፍሊት ኣብ ድሕረ-ገጻተን ዜናታት ክዝርግሓ ምጽነሐን ይፍለጥ። ብመሰረት ሮይተርስ ኣብ 2020 ዘካየዶ መጽናዕቲ፡ 52 ሚእታዊት መሕተት ካብ ዝተሓተቱ ኣውስትራልያውያን ማሕበራዊ መራኸቢታት ከም ምንጪ ዜና ከም ዝጥቐሙ ምሕባሮም ሓደ መርኣያ ናይዚ እዩ።
ፍርያተን ከዋዓውዓ ዝደልያ ትካላት ናብቲ ህዝቢ ብብዝሒ ዝጥቀመሉ ምንጪ ሓበሬታ ስለ ዝኸዳ፡ መራኸቢ ቡዙሃን ካብ መዋዓውዒ ዝረኽብኦ ኣታዊታት እናጎደለ ክመጽእ ምጽንሑ ይሕበር። ነዚ ንምፍዋሱ ድማ መንግስቲ ኣውስትራልያ ኣብዚ ጉዳይ ምስ ትካላት ተክኖሎጂ ዝርርባት ከካይድ ወነንቲ መራኸቢ ቡዙሃን ድፍኢት ይገብራ ምህላወን ይፍለጥ። ብዝኾነ፡ መንግስቲ ኣውስትራልያ ጀሚርዎ ዘሎ ስጉምቲ ናበይ ከም ዝበጽሕ ከምኡ’ውን ከኸትሎ ዝኽእል ጽልዋን ንምዕዛብ መንግስታት፡ ማሕበረ-ሰብ መራኸቢ ቡዙሃንን ትካላት ተክኖሎጂን ዓለምና ብጥንቃቐ ይዕዘብዎ ምህላዎም ክግመት ይከኣል። ድሮ’ውን ትካል ጎግል ኣብ ድሕረ-ገጹ ንዘውጽኦ ዜና ብዝምልከት ምስ ወናኒ ሓደ ካብ ዝዓበዩ መራኸቢ ቡዙሃን ዓለምና ዝኾነ ሩፖርት ሞርዶክ ዝርርባት ጀሚሩ ከም ዘሎ ተሓቢሩ።
