መስራቲትን ሓንቲ ካብ ሓለፍቲ ኣሃዱ ስነ-ምግባር ኣርቲፊሻዊ ብልሒ ትካል ጎግልን ዝኾነት ማርጋረት ሚሸል፡ ሕጊ ስራሕ ትካል ጢሒስኪ ብዝብል ምኽንያት ካብ ስራሕ ከም ዝተባረረት እቲ ትካል ኣብ ዘውጸኦ መግለጺ ሓቢሩ። እቲ መግለጺ ከም ዝሕብሮ፡ ማርጋረት፡ ካብ መምርሒ ትካል ወጻኢ ናይ ስራሕ ፋይላት ካብ ትካል ከም ዘውጽአት ክፍለጥ ተኻኢሉ ኣሎ።
ኣሃዱ ስነ-ምግባር ኣርቲፊሻዊ ብልሒ ትካል ጎግል ንሓለፍቲ እቲ ትካል ብዙሕ ደስ ዘየብል መግለጺታትን ኣካይዳ ክኽተል ዝጸነሐ ኮይኑ፡ ኣቐዲሙ’ውን ሓንቲ ካብ ሓለፍቲ’ዚ ትካል ንዝኾነት ኢትዮጵያዊ መበቆል ዘለዋ ትምኒት ገብሩ ብምጥሓስ ኣሰራርሓ ትካል ብምምኽናይ ካብ ስራሕ ከም ዘባረራ ይዝከር። ክልቲአን ሓለፍቲ፡ ኣብ ትካል ጎግል ቡዙሕነት ንኽህሉ ክጽዕራ ዝጸንሓ ኮይነን፡ ኣብ ርእሲኡ’ውን ኣብቲ ትካል ንዝግበር ልዕሊ ዓቐን ምቊጽጻር ዘለወን ዘይዕግበት ኣብ ዝተፈላለየ ኣጋጣሚታት ክገልጻ ምጽነሐን ተዓዘብቲ ይገልጹ።
ትምኒት ገብሩ ሓንቲ ካብተን ኣብ ዓውዲ ስነ-ምግባር ኣርቲፊሻዊ ብልሒ ግኑን ስም ዘለወን ተመራመርቲ ኮይና፡ ኣብቲ ትካል እንከላ ዘሕተመቶ ኣብ ቋንቋ ኣርቲፊሻዊ ብልሒ ዘሎ ሃጓፋት ዘብርህ መጽናዕታዊ ወረቐት በቲ ትካል ክትስሕቦ ጸቕጢ ይግበረላ ምንባሩ እያ ትሕብር። ብኣንጻር ናይዚ፡ ትካል ጎግል፡ ትምኒት ባዕላ እያ ስራሕ ገዲፋቶ ክብል ይምጉት።
ትካል ጎግል ኣብ ሰራሕተኛታቱ ብዘሎ ዋሕዲ ብዙሕነት ቀጻሊ ዝንቐፍ ኮይኑ፡ ብቐንዱ ግን ኣብ ኣርቲፊሻዊ ብልሒ ተመርኲሱ ዝቕርቦ ኣገልግሎት ብዙሕ ዘይንጹር ሕቶታት ከም ዘለዓል ተንተንቲ ተክኖሎጂ ይገልጹ።
